هرمي الزبالة في الشارع ... أنا حر

بعد البحث والمشاورة اتضحلى ان رمي القمامة (الزبالة ) في الشارع وعدم الحفاظ على النظافة دا من العناصر المهمة لخدمة المجتمع المصرى

طيب نحللها واحدة واحدة

انتو عارفين عدد العاطلين في الوطن العربي وصلوا كام ؟؟؟؟

وصلوا لـ16 مليون عاطل وعاطلة تقريبا (دا قبل الأزمة الاقتصادية العالمية )!!؟
طيب عارفين كام واحد من العشرين من مصر ؟؟؟

يقارب الـ 3 مليون عاطل وعاطلة

والعدد في زيادة صاروخية (بيسابق الزمن )

على فكرة رمى الزبالة من الحلول الهامة للتقليل من البطالة في مصر

قولى ازاي ؟؟؟

قولت ؟؟؟

اقولك .....

عارف كام عدد عمال النظافة في مصر ؟؟؟؟؟

تقريبا 40 ألف عامل وعاملة

طب تخيل بقى كل واحد حافظ على شوارع مدينته

والكل بطل يرمى الزبالة في الشارع

وكلنا بقينا نظاف

الـ40 ألف الغلابة دووووووول هيروحوا فيييييين

انت بكده بتقطع عيش 40 ألف واحد
طيب لو اتخيلنا العكس

لو كل واحد بقى رماله كام كيلوا كده زبالة في الشارع

شوف هنشغل كام واحد

طب تعالوا نحسبها احسن

لو فرضنا كل واحد هيرمي في اليوم كيلو واحد بس

واحنا وصلنا 80 مليون نسمة ماشاء الله

يعنى في اليوم 80 مليون كيلو زبالة يعنى تقريبا 80 ألف طن

يعنى في الشهر 00 24 مليون كيلو زبالة يعنى 2 مليار و400 مليون كيلو

يعنى 2 مليون و400 ألف طن زبالة فى الشهر

يعنى 28 مليون و800 ألف طن في السنة

ماشاء الله ربنا يزيد ويبارك طيب

احنا عندنا 40 ألف عامل

لو قلنا كل عامل هيشيله 100 كيلو زبالة في اليوم لما تطلع عينه

يعنى في اليوم هيشيله 4 مليون كيلو بس

يعنى متبقى 76 مليون كيلو ما اتشالوش

واحنا عندنا 3 مليون بطالة

يعنى احنا تقريبا عاوزين 760 الف عاطل هنشغلهم
دا غير المشرفين وكمان سواقين العربيات اللى هتنقلها
قول مليون نفر
يبقى بكده حلينا ازمة تلت العاطلين عن العمل !!!!!!!!!!

شوفتوا قد ايييه رمى الزبالة في الشارع مهم !!!!!! 




اقعدوا بالعافية