الحملة الانتخابية للمشير عبدالفتاح السيسي

برنامج صباح الخير يا ميسر :

- وكما عودناكم مشاهدينا الأعزاء .. فقضية الموسم وكل موسم اليوم هي السؤال الذي حير الجماهير ، " لو الفريق السيسي اترشح للانتخابات تفتكروا أي رمز هيكون مناسب ليه ؟ " ، هذا السؤال الفلسفي الوجودي الذي ينبع من عدمية خيال طارحه ، حير الجميع ، وأقلق منامهم ، ولأننا الوحيدين في برنامجنا هذا ، نجد الحل لمن لا حل له ، وعلى رأي المثل يا جماعة "اللي مالهوش حل ، يشتريله حل" ، وحل سؤالنا لهذا اليوم ، حل محتاج مخمخة ، تخطيط ، تكتيك ، خيال .. أيوة عليك نور .. محتاج خبير استراتيجي ، يمخمخلنا بخيال علمي مبني على أبحاث وأحلام علمية تحت غطاء لحاف ذو الأربع وجهات ..
يسعدنا ويشرفنا أن نستضيف السيد الفريق كاتو بيه الخبير الاستراتيجي .

- أهلا وسهلا بيك .. بس في الأول حابب أصلح معلومة .. أولا انا لواء متقاعد مش فريق .. وبشتغل خبير استراتيجي الصبح .. ومفسر أحلام آخر النهار عشان لو حد من السادة المشاهدين قالقه منامه وللا حاجة .

- أه .. انا اسف لحضرتك جدا ، وهطلع أطلع أموات المعد ، بس بعد الحلقة .

- لا ماتتعبش نفسك .. زمانه .. بيتروق في المعسكر اللي ورا الشمس شمال.

- اشمعنا المعسكر شمال .. هو مفيش يمين .

- المعسكر يمين .. للعيال السو اليمين ، والمعسكر شمال .. للعيال السو اليسار

- طب والمعكسر طوالي !؟

- ابقى تعالى وأنا أقولك .. هع هع هع

- هههههههه حلوة منك حضرتك .. وزير الإعلام استايل وكده .. المهم نخش في المهم .. حضرتك .. انجدنا .. أيه الحل .. الناس مش لاقيه رمز ..

- بص حضرتك ، من واقع خبرتي الاستراتوحلمية .. حلوة استراتوحلمية مش كده

- حلوة يا فندم

- من واقع حبرتي الاستراتوحلمية .. أقدر أقولك .. إن أهم حاجة في التسويق الناجح : الرمز ، والشعار ..

- ودي عرفتها لوحدك وللا حد قالهالك

- بدأت تتعبني .. وشكلك .. عاوز تعرف .. معسكر طوالي .. بيتعمل فيه أيه

- لا متشكر يا فندم .. معلش كمل ..

- زمبؤلك كده التسويق الناجح :: رمز وشعار .. احنا عندنا سلعة .. السلعة ديه هي سيدي وسيدك وسيد الناس كلها : الفريق السيسي .. والفريق السيسي هو سلعة حربية .. والسلعة الحربية .. يعني انتاج حربي .. وانتاج حربي .. يعني الرمز يكون حاجة فخر الصناعة الحربية المصرية .

- الله يا فندم .. تسلم أيد اللي لفلك .

- عشان كده أنا بقترح وبناشد الحملة الرئاسية لسيد الناس .. إن الرمز يبقى "كيس مكرونة الملكة ذات الحبات المتناسقة" ، فخر الصناعة الحربية المصرية ، والشعار يبقى : خش علم ع المكرونة .. واكسب معانا كيس صلصة هدية

- بس يا فندم مش شايف إنك مأفور حبتين ..

- مأفور ! بتقولي أنا اللواء متقاعد كاتو بيه مفسر أحلام آخر النهار .. مأفور .. مستنيك برة بعد الحلقة .

- يا فندم مقصدش .. بس كيس مكرونة .. ديه حاجة لوكال فشخ ..

- مممم هو انت عندك حق .. وانا فكرت في كده برده .. يبقى مقدمناش غير بلان بااااء .. الرمز : صوابع رابعة باللون الفيسفوري .. والشعار : يا كايدهم ..

- الله يا فندم .. فكرة جهنمية .. وبكده نضرب حجرين بعصفور .. أقصد حجر بعصفورين .. منه ننقط كل اللي بيعادونا .. ومنه تسويق ناجح للحملة الانتخابية .

- أولا يابن العالمة .. اسمها نضرب عصفورين بحجر .. ثانيًا .. ننقط أيه .. وشغل العنصرية والتفركة اللي انتم بتنتهجوه في القناة ده ..
المؤسسة العسكرية لا تسمح بالعنصرية .. احنا بنلم في المعسكرات اللي ورا الشمس على طول .. مش ليسه هننقط ونفقع ..

- تمام يا فندم .. وصلت .. وعلى رأي سيد الناس .. " مصر أم الدنيا .. وان طلعت البنت لامها .. اقلب مصر على فمها "

نطلع فاصل مع النشيد الوطني .. تسلم الأيادي تسلم يا سيس بلادي .....

ع الهامش : باب البيت بيترزع .. انا : مين !! .. من ورا الباب : أنا كاتو يالااه ... أنا : كاتو !! .. أه كاتو اللي بتتريق عليه وعلى سيدي وسيدك وسيد الناس كلها ... الباب اتكسر دخل كاتو ومعاه شوية عساكر .. هاتووووه ... أنا : على فين .. كاتو : على معسكر ورا الشمس طوالي ياروح ماما.